xoves, 19 de decembro de 2013

Almanaque 2014





Bo día:

Como sabedes, a ANPA Tea leva adiante un proxecto chamado LECTURA SOLIDARIA, no que vendemos libros de segunda man a 1 e 2 euros para financiar excursións e material escolar dos cativos de familias con problemas económicos.

Non quedamos somentes nisto; dende o Consello Escolar Municipal (no que estamos representados/as pola FANPO) conseguimos sacar adiante o compromiso plenario do Concello para que todos os rapaces e rapazas en risco de exclusión social da localidade teñan comedor escolar asegurado aínda que nos seus centros non o haxa.

E por isto que pedimos a vosa colaboura, xa sea difundindo esta nova para que todas as familias que o precisen acudan a informarse de cómo beneficiarse desta axuda; ou achegándovos polo posto de venda de libros sito no edificio de secretaría do centro.

Asemade, podedes reservar o almanaque 2014 do proxecto por somentes 2 euros. Quedan poucos, así que reserva xa o teu!

venres, 29 de novembro de 2013

Concurso de debuxo: O MELLOR DO NADAL



Voltamos un ano máis a organizar o concurso de debuxo. Lembrade:

BASES:

  • Todo o alumnado de primaria pode participar.
  • Cada concursante participará cun só debuxo (non collages, etc.) do tema proposto.
  • Os traballos serán presentados na lámina proporcionada pola ANPA Tea.
  • Os traballos dividiránse en tres ciclos: 1º, 2º e 3º ciclo de primaria.
  • Cada ciclo optará a tres premios otorgados aos tres primeiros postos.
  • Todos os e as participantes terán un agasallo polo sinxelo feito de participar.
INFORMACIÓN:


As láminas poderán recollerse os luns de 9 a 10, e os martes de 4 a 5 no local da ANPA. A lámina para os non asociados/as terá un custe de 1 euro, sendo de balde para os asociados/as.
DATA LÍMITE DE RECOLLIDA DE LÁMINAS: 3 DE DECEMBRO DE 2013.

A entrega de traballos será tamén no local da ANPA todos os luns de 9 a 10 e os martes de 4 a 5.
DATA LÍMITE DE ENTREGA DE TRABALLOS: 9 DE DECEMBRO DE 2013.

O xurado que evaluará os traballos, estará formado por 5 membros: equipo diretivo, alumnado, orientación, profesorado e ANPA.

luns, 21 de outubro de 2013

Xornada de Folga no Ensino


O Goberno central e os autonómicos, utilizando como escusa a crise económica, seguen recortando os recursos económicos e humanos do noso sistema educativo, malia que esta política de axustes non está logrando os obxectivos de aforro que di perseguir como amosan os datos de déficit e débeda pública.

Xunto aos recortes, estanse levando a cabo unha serie de reformas, como a LOMCE, o Real Decreto de Bolsas e Axudas ao Estudo, o Decreto de Comedores que desvincula do transporte escolar o dereito ao comedor, o desmesurado incremento das matriculas universitarias que, na nosa opinión, supoñen a volta a un sistema baseado na selección do alumnado para que o progreso nos estudos estea condicionado, con carácter xeral, ao nivel social e ás posibilidades económicas das súas familias, expulsando do sistema a toda aquela persoa que non encaixa nun perfil prefixado ideoloxicamente.

Ademais, os nosos actuais gobernantes empéñanse en ignorar a opinión dos cidadáns e estes, á súa vez, seguen amosando un rexeitamento frontal a esta política de recortes e contrarreformas como veñen a demostrar os resultados da "consulta cidadá pola educación" que se está a desenvolver nestes días. E isto é así porque sufrimos os graves prexuízos que se están producindo á educación pública, que serán moito peores a medio e longo prazo.

Nin os recortes, nin as reformas que se están implementando van resolver os problemas que temos. Todo o contrario, de continuaren por este camiño os problemas que temos agravaranse e, ademais aparecerán novos problemas que nos conducen a unha sociedade con menos cohesión social e máis desvertebrada. Unha sociedade que permite a destrución do seu potencial humano, renunciando á mellor educación de todos os seus integrantes, é unha sociedade sen futuro. Unha sociedade que faga da educación unha mercadoría, que aposte pola privatización de todo o público, pola pelexa entre os cidadáns para aplicar o "sálvese quen poida", é unha sociedade doente que está abocada a un suicidio social colectivo do que tardará, no mellor dos casos, varias décadas en recuperarse. Mentres, varias xeracións de cidadáns estarán condenadas ao fracaso e a convivir sen un presente e un futuro dignos.

É un auténtico ataque ao noso modelo social e de progreso que unha sociedade democrática non pode consentir sen renunciar á súa liberdade e os seus dereitos. Non podemos resignarnos, unha educación de calidade é imprescindible para mellorar a sociedade na que vivimos e para contribuír na conquista real e a extensión dos dereitos fundamentais sobre as que se asintan todas as sociedades democráticas.

É por iso que forma parte do noso deber denunciar e mobilizar á comunidade educativa contra a intención de destruír un modelo educativo de calidade e equidade que teñen os gobernos autonómico e estatal e polo que facemos un chamamento á sociedade para que participe nas mobilizacións que se convocan agora e en adiante, para mostrar o noso rexeitamento á LOMCE e aos recortes en todas as ensinanzas e etapas, á que están chamados todos os sectores, alumnado, familias, docentes e persoal dos centros educativos e universitarios.

Diante desta situación, o sector educativo seguirá mobilizándose e esixindo aos gobernos que se atendan as demandas da Comunidade Educativa para resolver os problemas que temos e abordar as reformas necesarias para mellorar a calidade do noso sistema educativo.

Por iso, a ANPA Tea esixe que cesen todos os recortes educativos, do mesmo xeito que esiximos o cese do resto de recortes sociais.

De igual modo, esixe que se incremente o número de bolsas e a súa cuantía; que se recuperen os programas educativos que demostraron o seu éxito nos últimos anos, en definitiva que se recupere o nivel de investimento educativo. 

Esiximos que se retire a LOMCE e que se inicie un proceso de diálogo e procura de solucións conxuntas coas organizacións representativas da Comunidade Educativa que dote de estabilidade ao sistema, desde a Educación Infantil ata a Universidade.


mércores, 12 de xuño de 2013

PROPOSTA PARA A IMPLANTACIÓN DUN PROGRAMA DE REUTILIZACIÓN DE LIBROS DE TEXTO

A ANPA Tea organiza un referendo a fin de que os pais e nais manifestemos se estamos de acordo con esixir a implantación dun sistema de reutilización de libros de texto.

PROPOSTA PARA A IMPLANTACIÓN DUN PROGRAMA DE REUTILIZACIÓN DE LIBROS DE TEXTO

No edificio de dirección do centro, en horario de 09:00 a 10:00, de 13:00 a 14:00 e de 16:00 a 17:00 horas, haberá unha urna e papeletas impresas co seguinte texto:
 _____________________________________________

Gustaríache que se reimplantara o sistema anterior de reutilización de libros de texto?

  • SI

  • NON
_______________________________________________

A Asociación de Nais e Pais de Alumnos/as Tea do CEIP Fermín Bouza Brey de Ponteareas, en colaboración coa FANPO (Federación de ANPAs de Centros de Ensino Público de Ponteareas), están a promover unha reclamación diante da Consellería de Educación e Ordenación Universitaria para que esa consellería volte ao sistema de reutilización dos libros de texto polas seguintes razóns:

  1. A necesidade de que os libros de texto da educación obrigatoria non sexan unha carga económica para as familias. No actual curso estamos a ver a dura situación na que se atopan as familias debido a crise social e económica, o desemprego e as reducións salariais. As bolsas destinadas á axuda de compra de material son insuficientes para garantir que todo o alumnado estea provisto dos libros de texto e outro material necesario.
  2. A seguridade de que o tratamento de materiais que han ser devoltos en boas condicións, para o seu uso posterior, incide positivamente na educación dos nosos fillos e fillas.
  3. A progresiva implantación, necesaria e así mesmo demandada nesta solicitude, de novas tecnoloxías a utilizar no ensino, será moito máis doada cando o material didáctico non dependa xa da capacidade económica das familias.

Pedímosvos entón que participedes no referendo que a ANPA Tea do CEIP Fermín Bouza Brey de Ponteareas celebrará o vindeiro 18 de xuño no edificio de dirección deste centro escolar. Para exercer os vosos dereitos deberedes identificarvos co DNI ou pasaporte á hora de votar. Lembrade que tanto a nai coma o pai de cada unidade familiar podedes facelo.

É moi importante que acudamos masivamente a votar, xa que os datos resultantes deste referendo servirán para respaldar este pedimento ante a Consellería de Educación, por parte da nosa ANPA e tamén pola federación á que pertencemos: Federación de ANPAs de Centros de Ensino Públicos de Ponteareas (FANPO).

Grazas pola vosa colaboración neste proxecto tan necesario nestes momentos en que moitas familias en situación económica precaria xa non poden soportar os gastos que supón a compra de libros de texto todolos anos, mailo material escolar.

venres, 10 de maio de 2013

ÉXITO DE SEGUIMENTO DA FOLGA XERAL DE ENSINO NO CEIP FERMÍN BOUZA BREY

A Asociación de Nais e Pais de Alumnos/as Tea do maior centro público de primaria de Ponteareas, celebra o éxito da xornada de folga no Ensino que se vivíu onte na vila. 


Este centro, que conta actualmente con case 600 nenos e nenas, tivo unha porcentaxe dun 87% de cativos que non asistiron á clase. Datos que poderían aplicarse ao resto de centros de ensino público de Ponteareas, onde a maioría do alumnado secundou a folga. 

Isto tradúcese no total rexeitamento colectivo das nais e pais a acatar a lei imposta e discriminatoria do ministro Wert, a LOMCE. 

A Anpa Tea traballou arreo co obxectivo de que ningún pai e ningunha nai deste centro quedara sen saber en qué consiste esta lei e cómo vai afectar as súas vidas e ás dos seus fillos e fillas. Deste xeito, informouse de todas as formas posibles dende a directiva, incluíndo charlas nas asembleas por parte de profesionais na materia. 

Pola contra, valórase non tan positivamente que somentes 10 mestres e mestras secundaran a folga, dos 40 aproximadamente cos que conta este centro. 

Asemade, a manifestación convocada pola tarde pola Federación de Nais e Pais de Centros Públicos de Ensino de Ponteareas (FANPO) voltou ser un gran éxito de asistencia, cunha marea de xente que ocupaba varias rúas á vez ante as caras atónitas dos e das que preferiron sentarse nas terrazas a esperar a que os que sí se mobilizan polo que consideran inxusto, lles defendan os seus dereitos. 
Por todo isto a directiva da ANPA Tea quere agradecer ás nais, pais, mestres, mestras, alumnos e alumnas concienciados/as coa defensa do Ensino Público, a dura loita que están levando a cabo e que é un grande exemplo para todos. E tamén que SÍ PÓDESE, xa que hoxe recibimos con alegría a nova de que aprázase a aprobación da LOMCE e temos moi claro que, aínda que dende o goberno non o recoñezan, foi grazas á mobilización destas persoas.

luns, 6 de maio de 2013

9 de Maio - FOLGA XERAL de toda a COMUNIDADE EDUCATIVA

Pica na imaxe para vela no seu tamaño orixinal
O xoves 9 de maio, está convocada unha xornada de folga contra a LOMCE (Ley Orgánica de Mejora de la Calidad de la Educación). A ANPA Tea, apoiará esta FOLGA TOTAL DO ENSINO, convocada a nivel estatal polos sindicatos maioritarios nacionais e galegos, polo sindicato de estudantes, e a Confederación de ANPAS estatal (CEAPA). Tamén haberá unha manifestación para ese mesmo día ás 19.30 horas que sairá da Casa do Concello de Ponteareas e percorrerá as rúas principais da vila.

A Anpa Tea pide a máxima mobilización por parte dos pais e nais, apoiando esta xornada de folga e procurando non mandar os nenos e nenas á escola. Organiza colectivamente o coidado dos cativos que non asistirán a clase.

Defende a Educación dos teus fillos e fillas.

A LOMCE

A Lei Orgánica para a Mellora da Calidade Educativa (LOMCE) responde a un modelo ideolóxico conservador, que non cre na igualdade de oportunidades de todos os nenos e nenas nin na educación como instrumento de ascenso social das clases máis desfavorecidas, e para o cal a atención á diversidade é canto menos unha frivolidade. Ese modelo avoga pola superación da crise da man da eliminación do público e os recortes en educación. Desde este enfoque é practicamente imposible a redución das taxas de fracaso escolar ás que di querer combater o ministro Wert.

A diagnose é débil e claramente ideolóxica. E as medidas que o Goberno propón para atallar o fracaso escolar tamén son receitas do pasado, e que demostráronse inútiles pola experiencia e a investigación educativa: adianto da separación do alumnado aos 14 anos, reválidas ao finalizar cada etapa, repetición de curso, sometemento á presión do exame, etc.

Promóvese a privatización coa xestión en clave empresarial dos centros educativos, así como co transvase de alumnado desde a escola pública cara á privada, con e sen concerto. Foméntase a competitividade entre estes e a súa especialización ata pola tipoloxía do alumnado, o que fará que os centros con mellores resultados reciban maior financiamento e non como se debese de facer, precisamente os centros onde o alumnado teña maiores dificultades é onde o investimento ha de ser maior para compensar as desigualdades sociais e que o alumnado pertencente a contornas sociais máis desprotexidos teña as mesmas oportunidades.

Esta Lei, se finalmente resulta aprobada, será moi lesiva para o sistema educativo español porque nos devolverá á escola do pasado, esa que estaba en mans de entidades privadas, a maioría organizacións relixiosas católicas, e cuxo resultado obtido durante catro décadas era unha escola de calidade para uns poucos, a expulsión do sistema educativo de forma temperá da maioría da sociedade, a incultura como etiqueta asociada ao noso país, e un atraso histórico inaceptable que só con todo o realizado desde que vivimos en Democracia fomos capaces de eliminar case na súa totalidade.

POR QUÉ NON DEBEMOS ACEPTAR A LOMCE

  1. É unha reforma mercantilista.
  2. Converte a educación nunha carreira de obstáculos con múltiples reválidas.
  3. Reduce a carga lectiva a uns contidos mínimos.
  4. Opta pola recentralización e control do currículo pola Administración.
  5. É clasista e segregadora a través de itinerarios selectivos e temperáns.
  6. Somete aos centros ás esixencias do mercado competitivo, clasificándoos en rankings.
  7. Recorta o financiamento en función dos resultados.
  8. Aposta pola xestión empresarial dos centros públicos.
  9. Socava a participación democrática da comunidade educativa nos centros.
  10. Fomenta o negocio educativo e “legaliza” os concertos con centros que discriminan por razón de sexo.
  11. É unha ofensiva contra o galego que deixa a lingua propia como residual no ensino.
  12. Rescata unha alternativa para a materia de relixión, cedendo así ás reivindicacións da Conferencia Episcopal.

luns, 29 de abril de 2013

Campamento de Verán


A ANPA Tea do CEIP Fermín Bouza Brey organiza un campamento en horario de mañán no propio centro. As inscricións poden ser por mes completo ou por quendas. O grupo mínino será de 15 nenos e nenas.

IDADE:
  • de 3 a 12 anos.
 DURACIÓN:
  • do 1 ao 31 de xullo (en dúas quendas).
 HORARIO:
  • de 09:00 a 14:00
 ACTIVIDADES:
  • obradoiros de reciclaxe creativa
  • obradoiros medioambientais
  • xogos tradicinais
  • actividades circenses
  • clown
  •  xogos de auga
  • cociña creativa
 TARIFAS:
  • 110€ por mes completo
  • 55€ por quenda.
 DESCONTOS:
  • mes completo: 10€ por unidade familiar.
  • quenda: 5€ por unidade familiar.
DATA LÍMITE INSCRIPCIÓN:
  • 27 de maio
INGRESOS NA CONTA:
  • 0182/1395/14/0201531398.
  • facer constar no ingreso nome e apelidos do alumno/a.
SOMENTES PARA CENTROS PÚBLICOS DE PONTEAREAS

mércores, 10 de abril de 2013

Fotos de finais de ciclo

Informamos ás nais e pais do alumnado de 4º e 6º de primaria que a sesión de fotos organizada pola ANPA Tea non seu levou a cabo pola negativa do profesorado de ditos cursos.
Os argumentos esgrimidos para esta negativa foron:
  • É unha actividade discriminatoria.
  • É en beneficio a unha empresa privada.
Ante isto, a ANPA Tea lembrálle que o fotografo é o mesmo que fai as camisetas de fin de curso de sexto dende hai varios anos e a excursión de fin de curso de 6º organizada polo profesorado é cunha empresa privada. 
Levaremos este tema a Consello Escolar para insistir na colaboración entre proxenitores e profesorado.

mércores, 13 de marzo de 2013

Velorio pola EDUCACIÓN PÚBLICA


 
A Asociación de Nais e Pais Tea a través da FANPO (Federación de ANPAs de Centros de Ensino Públicos de Ponteareas) ante a gravísima situación actual dos salvaxes recortes na educación pública e a ante a intención do goberno central en Madrid da implantación da LOMCE (Lei Orgánica para a Mellora da Calidade Educativa):

CONVOCA:

A todas as familias e ao alumnado, persoal docente e a toda a Comunidade Educativa de Ponteareas e a súa Comarca, a sumarse á CONCENTRACIÓN-VELORIO de protesta que convocamos o vindeiro martes 19 de marzo, a partires das 7 da tarde diante da Casa do Concello de Ponteareas, a fin de que masivamente fagamos unha protesta firme ante a situación que atravesa o noso sistema de ensino público.

A Comunidade Educativa esiximos:
  1. O cesamento fulminante do Ministro Wert e de todo o seu equipo.
  2. A retirada inmediata do inaceptable anteproxecto de reforma da LOE.
  3. A paralización inmediata de todas as medidas de recorte e desmantelamento do ensino público.
  4. E a apertura, cun novo equipo ministerial, dun proceso real de diálogo cos diferentes sectores da Comunidade Educativa para buscar, entre todos, o consenso necesario para mellorar, de verdade, o ensino público.
Facemos un chamamento especial ás familias para que acudan sen ningunha vacilación a fin de reclamar e defender os dereitos do alumnado. Non queremos unha xeración sen futuro.

Asistamos de luto e con velas como require a ocasión!
 

luns, 25 de febreiro de 2013

Perigos de Interenet

A Asociación de Nais e Pais de Alumnos TEA do CEIP Fermín Bouza Brey, ten o gusto de convidalos á Charla “Perigos de Internet” que se celebrará hoxe

Luns, 25 de febreiro de 2013, ás 19.00 h. no Salón de Actos do IES “Val do Tea” de Ponteareas.

A charla será impartida por D. Gonzalo Sotelo, Responsable do Equipo de Investigación Tecnolóxica da Comandancia da Garda Civil de Pontevedra, Diplomado en Policía Xudicial e Profesor Asociado da Universidade de Vigo.
Resaltamos a importancia deste tema tanto para proxenitores como para o alumnado que comeza a utilizar regularmente as redes sociais.

venres, 8 de febreiro de 2013

A ANPA TEA CELEBRA O ÉXITO DO SEU PROXECTO SOCIAL “LECTURA SOLIDARIA”

 
NESTA XORNADA DE ENTROIDO TAMÉN REIVINDICARON A URXENCIA DA REFORMA INTEGRAL DO CEIP FERMÍN BOUZA BREY

Na xornada festiva de hoxe, membros da ANPA Tea do CEIP Fermín Bouza Brey de Ponteareas, comezaron o proxecto social “Lectura Solidaria” onde venden a prezos populares (1 e 2 euros), libros donados polas nais e pais do alumnado. Os cartos recadados serán destinados ao pago da excursión de fin de curso daqueles nenos e nenas cuias familias estén pasando por dificultades económicas.

O éxito foi abrumador, polo que non se descarta que haxa diñeiro dabondo para outras necesidades, como libros de texto ou material escolar.
Este proxecto terá continuidade mentres haxa persoas solidarias que donen e merquen libros, quedando o posto de venda no edificio de administración do centro.

Este non é o único proxecto social e solidario levado a cabo pola ANPA Tea, que colabora co Centro de Servizos Sociais da vila para que os cativos non sufran tan duramente os efectos devastadores das políticas discriminatorias que se están levando a cabo nestes últimos anos.
 

Asímesmo, a ANPA Tea ao tempo que realizaba este traballo, reivindicaba cos seus disfraces a urxencia da reforma integral tan prometida pola Xunta no seu momento e tan esquecida agora.
 

xoves, 7 de febreiro de 2013

luns, 4 de febreiro de 2013

II Xornada de Loita no Ensino Público

Estimada nai, estimado pai:

Dende a Asociación de Nais e Pais Tea e a través da Federación de ANPAs de Centros de Ensino Públicos de Ponteareas (FANPO), estase a loitar contra a implantación da LOMCE (Lei Orgánica para a Mellora da Calidade Educativa) e contra os recortes no Ensino. Toda a Comunidade Educativa está de acordo neste tema. A implantación da LOMCE será lesiva para o alumnado e provocará o transvase de orzamentos cara o ensino privado.

É por isto que apoiamos a FOLGA convocada polo Sindicato de Estudantes para os días 5, 6 e 7 de febreiro (para alumnos de 3º e 4º da ESO, BACHARELATO, CICLOS FORMATIVOS e PCPI) e vos instamos a que tamén a apoiedes e asistades ás mobilizacións de protesta na nosa Vila:

  • Mércores 6 de febreiro ás 12 da mañá MANIFESTACIÓN que sairá dende os IES
  • Xoves 7 de febreiro ás 19:00 CONCENTRACIÓN convocada pola FANPO diante do Concello de Ponteareas
a fin de que consigamos paralizar a aprobación desta Lei do Ministro Wert no Parlamento do Estado e polo tanto, o empeoramento na educación dos nosos fillos e fillas.