sábado, 25 de abril de 2009

O CONCELLO DE PONTEAREAS NON PAGA O QUE PROMETEU ÁS COMPARSAS DO C.E.I.P. FERMÍN BOUZA BREY QUE PARTICIPARON NO ENTROIDO 2009

O Concello de Ponteareas débelle ás comparsas do C.E.I.P. Fermín Bouza Brey a cantidade de 200 €, por participar no Entroido 2009 da vila.

Na páxina web do Concello do día 16 de Febreiro, pódese ler: “As bases do concurso establecen que cada comparsa – que deberá contar cun mínimo de 20 membros– recibirá do Concello unha axuda económica de 100,00 €.”

Os rapaces e rapazas que o día 22 de Febreiro formaron parte destas dúas comparsas da escola, inscribíronse no Concello e coa axuda dos seus profesores e pais, deseñaron e fixeron os disfraces, desfilaron e cantaron as súas coplas no escenario da Praza Maior; e todo isto coa ilusión de recibir eses cartos para empregalos na excursión de Fin de Curso.

Logo de máis de dous meses, aínda eses cartos non foron recibidos polos responsables das comparsas. Neste tempo, tanto os organizadores coma a directiva do A.N.P.A., lembráronlle en varias ocasións ó Concello a necesidade dos cartos ante a inminente excursión, pero o único que recibiron a cambio, foi sempre a mesma mentira: “mañá o ingresamos”, “ó vindeiro luns o ingresamos”, “non vos preocupedes que en dous días tédelo na conta”. Incluso recibiron estas palabras de boca da mesma Nava Castro.

Na mesma páxina web do Concello pero no día 25 de Febreiro sinalan “que tódalas comparsas recibiron 200 euros en concepto de participación e o Concelleiro de Cultura valorou como un autentico éxito a participación e comprometeuse a que a súa concellería porá a disposición dos participantes mellores premios en próximas edicións.”, e no día 27 este mesmo conselleiro, Andrés Sampedro, engadiu que seguirá traballando “de cara a incentivar, aínda máis, a participación de asociacións e colectivos nesta festa tradicional”.

A A.N.P.A. do Bouza Brey considera unha grave falta de respeto o engano ó que son sometidos os alumnos participantes deste evento e reitera a súa petición ó Concello de que cumpla coas bases do concurso que eles mesmos impuxeron.

venres, 24 de abril de 2009

O Consello Escolar Municipal de Ponteareas rexeita a ampliación prevista para o C.E.I.P. Fermín Bouza Brey.

Pide que se manteña no presuposto a reforma integral do centro e que se constrúa un novo centro de infantil e primaria.


Na reunión do Consello Escolar Municipal celebrada hoxe (iniciada ás 12 horas e rematada pasadas as 13 horas) aprobouse entre outros aspectos unha resolución que rexeita as obras de ampliación aprobadas pola Consellería de Educación destinadas a incrementar o número de liñas, porque suporía a reducción da superficie do patio e daría como resultado un macro centro no que se dificultaría o labor educativo do profesorado. A resolución aprobada por unanimidade, foi presentada polo representante de CCOO nese órgano, Román Alonso Santos. A reunión, presidida polo concelleiro de educación, contou tamén coa presencia de catro representantes da FANPO, unha profesora representante da CIG, un profesor representante do CRA e o presidente da Asociación de Empresarios.

Na citada reunión deste órgano que ten un carácter consultivo aprobáronse ademais outros acordos destinados a mellora da situación escolar no concello.

ACHÉGASE O TEXTO LITERAL DA RESOLUCIÓN APROBADA
  • RESOLUCIÓN

Ó Consello Escolar Municipal de Ponteareas, reunido a 24-04-09, informado sobre as obras de reforma e ampliación que a Consellería de Educación e Ordenación Universitaria da Xunta de Galicia ten previsto realizar no CEIP Fermín Bouza Brey, tendo en conta a opinión manifestada vai un ano polo 83% do profesorado dese centro, aprobamos a seguinte resolución:
  1. Rexeitamos totalmente a construcción doutro edificio máis nese recinto escolar, destinado a incrementar o número de liñas e, en consecuencia, ó número de postos escolares, porque non só suporía a reducción importante da superficie do patio de recreo, senon que tamén dificultaría o labor educativo do profesorado no macro centro resultante.
  2. Solicitamos a reforma integral deste centro e o arranxo urxente de todas as carencias de infraestructuras, de instalacións, das condicións de habitabilidade e seguridade, das condicións arquitectónicas e técnicas, etc, que impiden o normal desenvolvemento da práctica educativa.
  3. Consideramos necesario dar unha solución inmediata ao problema da masificación do centro, debido tanto á elevada ratio por aula, como á saturación dos espazos, así como ao seu deterioro xeral, polo que consideramos que si é necesaria a creación dun novo centro de Educación Infantil e Primaria que atenda ás actuais necesidades e demandas sociodemográficas do Concello de Ponteareas.
  4. Solicitamos que polo presidente deste Consello Escolar se de traslado urxente desta resolución á Consellería de Educación.

Ponteareas, 24 de abril de 2009


luns, 13 de abril de 2009

Excursión a Vigo.

O vindeiro venres 17 de abril, os nenos e nenas de 5º curso, van ir a Vigo de excursión.
O programa previsto será:
  • Teatro García Barbón, onde disfrutarán dunha obra de teatro.
  • Merenda
  • MARCO (Museu da Arte Contemporánea)
O custo da excursión será de 5´50 €, aínda que a A.N.P.A. subvencionará con 2´50 € a cada un dos nenos e nenas afiliados.www.marcovigo.com